Eqaluit junimi Kalaallit Nunaata kangerluinut pigaangata nalunngilarput sukisaarsaatigalugu aalisariartartut angalaarnissartik piareersareersimasaraat. Qissattaatitik atortutillu allat aaqqissuutereersimasarpaat. Tassami julimi erinitsaassillutik matumut kasuttortarput, eqaluit kuunni amerlasuunngorlutik qummukaaruttornerini.
Sukisaarsaatigalugu aalisariarneq
Kalaallit Nunaanni eqalunniarneq tassaavoq nalunnginnittunut narrutuunullu tulluartoq. Tamannami inuilaarsuarmik misigisaqarusuttunut, avinngarusimasumi qaqqat qooruini kuunni innarlerneqarsimanngitsuni sukkasuumik ersaarissumillu kuuttuni aalisarfissatsialaavoq.
Erniinnaq piffissaq naatsoq pisoqarfiungaatsiartorlu nallilerparput!
Piffissami tassani eqaluit sakkortuumik qissallallutik aalisartup qissattaataanut nutsuilissapput, soorlumi aalisagaq aalisartorlu akersuutiinnartut. Tamanna kapisiliup akiuuttarneranut assingungajassinnaavoq.
Kalaallit Nunaata kitaani eqaluit kuui
Kalaallit Nunaata kitaani sukisaarsaatigalugu aalisarneq Sisimiut, Maniitsup Kangerlussuullu eqqaanni ingerlanneqakkajunnerusarpoq – sineriaannimi kuuit qulit missaanniittut sukisaarsaatigalugu aalisarfigineqarluarsinnaasut nassaassaapput.
Aalisarfiginiarlugit ornittakkat inuilaatut misigisassaapput, umiatsiamik qulimiguulimmilluunniit taamaallaat orninneqarsinnaasut. Kuuit tamarmik immikkut inunnit 6-12-nit taamaallaat aalisarfigineqakkajupput. Taamaattumik sukisaarsaatigalugu aalisarumatuut, eqaloqarfinnut ikittuinnaat ornittagaannut aalisariarfissaqarluarput.
Kalaallit Nunaata kujataani sukisaarsaatigalugu aalisarneq
Kujataa aamma taaneqartarpoq: ”Kalaallit Nunaata pequusivia”, tassanilu najugallit qanga nunaseqqaarnerminniilli nalusimanngilaat kuuit piffimmiittut qanoq eqaloqartiginersut.
Naasorissaasuni Ipiutami Narsap eqqaaniittumi kiisalu Tunulliarfimmi, Eriksfjordimik aamma taasagaanni, julimiit septembarip tungaanut niviugaasalerluni nalluutilerlunilu qissattarnissamut pissutsit pitsaalluinnartuupput. Ipiutami kuuk mikisunnguuvoq najoruminartoq, kuuilli allat erseqqaarissumik kuuttut niviugaasalerluni qissattarnissamut piukkunnarlutik. Kuuit erseqqaarinngitsumik kuuttut sermersuarmeersut nalluutilerluni qissattarnissamut piukkunnartuupput.
Kuuit ataasiakkaat tikikkuminarnerisa ulluinnarlugu aalisariarnissaq pisariittunnguutippaat, ingammik Narsarsuarminngaanniit. Maluginiarparpullu sukisaarsaatigalugu aalisariat ilaat piffimmi maani namminneq piumasaminnik assigiinngitsorpassuarnik periarfissaqarnertik atorluartaraat.
Piffimmi piorsarsimassuseq sukisaarsaatigalugulu aalisariarneq
Kuuk alalaassallugu piffissaqaraanni aalisarnilikkersaattoqanngippallu, piffimmi piorsarsimassuseq, pinngortitamut atalluinnartoq alakkassallugu aamma pissarsiaqarfiginarpoq.
Kalaallit Nunaata kujataani qallunaatsiaat illukuisa eqqaassutissippaatigut, piffimmi atlantiku ikaarlugu umiarsuit aqqutaannut qanittumiittumi, qanga nunasisarsimasut nikerartuusimasut. Qallunaatsiaat naasorissaasutut ileqqutoqaat suli piffimmi savaateqarfinni atuupput.
Kalaallit Nunaata kitaani inuit ilaqutariiaat ukiorpassuarni kuunnut eqaloqarfiusunukakaasarput. Ilaqutariit tupikaasarput sapaatillu akunnerata naanerani aasami aggiasarlutik. Malugissajunnarsivallu aalisakkat pujoorivinni, pinngortitap pissarititaanik nammineq sanaani, pujoorneqartartut. Inuit piffimmi najugallit sukisaarsaatigalugulu aalisartartut kuummi assigiinngitsuni aalisarfeqartarput, inissaqaqaarlu. Taamaattumik immissinnut ajoqusersornasi piffimmeeqatigiissinnaavusi.
Kalaallit nunaanni sukisaarsaatigalugu alisariarneq
Qajartorneq
Kalaallit Nunaanni najugaqalersut siulliit ullutsinnilu misigisassarsiorlutik sapiisertartut ulluinnarnilu pinngortitami misigisartakkat kulturikkut atassuteqaatigaat qajartorneq.
Pisuttuarneq
Timaata isorartoorujussuarmi qaqqat inngissui tatsillu qillarissut, illoqarfiliornerit ajortinneqarnikuunngillat. Oqakkajuppugut; pinngortitamut qanittumi illuliortaraluarluta silamiinneq ilutsigut pilluarnarnerpaatipparput.
